ស៊ន សៀវ​ម៉ី ឈ្នះ​កៅអី​នៅ​អូឡាំ​ពិក​ជា​ប្រវត្តិ​សាស្រ្ត​ក្នុង​រយៈ​ពេល ៦២ ឆ្នាំ​

14

កីឡា​ការិនី​តេ​ក្វាន់ដូ​ ស៊ន សៀវម៉ី របស់​កម្ពុជា បាន​ឈ្នះការ​ប្រកួត​ជម្រុះ​ដើម្បី​ទទួលបាន​សិទ្ធិ​ទៅ​ចូលរួម​ការ​ប្រកួត​ក្នុង​ព្រឹត្តិការណ៍​កីឡាអូឡាំពិក​អន្តរជាតិ​លើកទី ៣១ ឆ្នាំ ២០១៦ នៅប្រទេស​ប្រេស៊ីល​ ពោល​គឺ​ទទួល​បាន​កៅអី​ពេញ​សិទ្ធិតំណាង​ឲ្យ​ព្រះ​រាជាណា​ចក្រកម្ពុជា ដែល​នេះ​ជា​ព្រឹត្តិការណ៍​ប្រវត្តិសាស្ត្រ​មួយ​ត្រូវ​បាន​ចាត់ទុក​ថា ​សមិទ្ធផលដ៏​អស្ចារ្យ​សម្រាប់​មាតុភូមិ​ខ្មែរ​ក្នុង​រយៈ​ពេល​ជាង ៦២ ឆ្នាំ។

ស៊ន សៀវម៉ី ទទួល​បាន​លទ្ធផល​គួរ​ជាទីមោទនភាព​ ក្រោយ​ពី​បាន​ប្រកួត​ឈ្នះ​កីឡាការិនី​មកពីប្រ​ទេស​តាហ្ស៊ីគីស្ថាន និង​ឈ្នះ​កីឡាការិនី​មកពី​ហ្វីលីពីន​ក្នុង​ការ​ប្រកួត​ជម្រុះ​ជើងឯក​តេក្វាន់ដូ​ទ្វីប​អាស៊ី នៅប្រទេស​ហ្វីលីពីន ដែល​ចាប់ផ្តើម​ដំណើរ​ការ​ចាប់ពី​ថ្ងៃទី ១៦ ដល់​ថ្ងៃទី ២០ ខែ​មេសា​ ឆ្នាំ ២០១៦។

លោក​វ៉ាត់ ចំរើន អគ្គ​លេខាធិការ​គណៈកម្មាធិការ​ជាតិ​អូឡាំពិក​កម្ពុជា មាន​ប្រ​សាសន៍​ថា៖ «ជ័យ​ជម្នះ​របស់​កីឡាការិនី​ស៊ន ​សៀវម៉ី លើក​នេះ​ត្រូវបាន​ស្ថាប័ន​ជាតិ និង​អន្តរជាតិ​កត់ត្រាក្នុង​ប្រវត្តិសាស្ត្រ​ពីព្រោះ​រយៈពេល ៦២ ឆ្នាំ ទើប​តែទទួល​បាន​សិទ្ធិ​ពេញលេញ​ទៅ​ចូលរួម​ប្រកួត​ក្នុងព្រឹត្តិការណ៍​អូឡាំពិក​អន្តរជាតិ»។

លោកបាន​ប្រាប់​បន្តឲ្យ​ដឹងថា៖ «លើក​មុនៗ​កម្ពុជា យើង​ធ្លាប់​ទៅ​ចូលរួម​ប្រកួត​ខ្នាត​អូឡាំពិក​អន្តរជាតិ​នេះ​តាមរយៈ​ភាព​អនុគ្រោះ​តែប៉ុណ្ណោះ ប៉ុន្តែ​ពេល​នេះ​ស៊ន​ សៀវ​ម៉ី ដណ្តើម​បាន​កៅអីពេញ​សិទ្ធិ​សម្រាប់​ការ​ប្រកួត​នៅ​ប្រ​ទេស​ប្រេស៊ីល​ខាងមុខ​»។

ទាក់ទង​ទៅ​នឹង​ប្រាក់​រង្វាន់ លោក​វ៉ាត់ ចំរើន បាន​បន្ថែម​ថា៖​ «ខ្ញុំ​មិនចង់​និយាយ​ពី​ប្រាក់​រង្វាន់​ទៀត​ទេ ពីព្រោះ​យើង​កំពុង​តែមាន​មោទនភាព​ខ្លាំង​ដោយ​សារ​តែចលនា​កីឡា​របស់​កម្ពុជា បានឈាន​ចូលទៅ​ដល់​កម្រិតអូឡាំពិក​អន្តរជាតិ​ដូច​ក្នុង​ក្តីស្រមៃ ហើយ​គោល​ដៅរបស់​ថ្នាក់​ដឹកនាំ​កីឡា​យើង​បាន​សម្រេច​ហើយ»។

លោក​ Choi Yong Sok ដែលជា​គ្រូ​បង្វឹក​របស់​ស៊ន សៀវម៉ី បានប្រាប់​ឲ្យ​ដឹង​ថា៖ «ម្ចាស់​មេដាយ​មាស​ទ្វីប​អាស៊ី សៀវម៉ី បាន​ជាប់ទៅ​ប្រកួត​ក្នុង​ព្រឹត្តិការណ៍​កីឡា​អូឡាំពិក​នៅប្រទេស​ប្រេស៊ីល​នាពេល​ខាងមុខ​ហើយ។ ជ័យ​ជម្នះ​នេះបាន​ផ្តល់​ឲ្យ​កញ្ញា​ស៊ន​ សៀវ​ម៉ី ទទួល​បាន​សិទ្ធិ​គ្រប់គ្រាន់​ក្នុងការ​ចូលរួម​ប្រកួត​ព្រឹត្តិ​ការណ៍​ធំលំដាប់​ពិភពលោក​គឺអូឡាំ​ពិក​ហ្គេម ដោយ​ការ​ចំណាយ​សព្វ​បែបយ៉ាង​ពេល​ទៅប្រកួត​ក្នុង​ព្រឹត្តិការណ៍​អូឡាំពិក​ខាងមុខ​ គឺជា​បន្ទុក​ខាង​ម្ចាស់​កម្មវិធី​ចេញ​ឲ្យ​ទាំងអស់»។

ប្រភព​ពីមន្ត្រី​ជាន់ខ្ពស់​សុំមិន​បញ្ចេញ​ឈ្មោះ បាន​អះអាង​ថា នឹងមាន​ការស្នើ​ជារួម​មួយ​ទៅ​កាន់​រាជរដ្ឋាភិ​បាល​កម្ពុជាដើម្បី​រៀបចំ​ពិធីទទួល​កីឡាការិនី​ស៊ន​ សៀវ​ម៉ី នៅពេល​ត្រឡប់​មកវិញ​នៅ​ប៉ុន្មាន​ថ្ងៃ​ទៀត​ខាង​មុខ​នេះ ខណៈ​ដែល​ក្រ​សួង​អប់រំ​ យុវជន​ និង​កីឡា​ និង​គណៈកម្មាធិការ​ជាតិ​អូឡាំ​ពិកកម្ពុជា ​កំពុង​តែ​សាទរ​ជ័យជម្នះ​ជា ប្រវត្តិសាស្ត្រ​មួយ​នេះ៕​

ប្រភព៖​ www.postkhmer.com

Submit a Comment

Your email address will not be published. Required fields are marked *

Show Buttons
Hide Buttons