អាជ្ញាធរ​ឲ្យ​អ្នក​ផ្តល់​កម្ចី​ក្រៅ​ផ្លូវការ​ចុះ​បញ្ជី​ឲ្យ​បាន​ឆាប់

9-Money_3

ភ្នំពេញៈ ​មន្ដ្រី​រដ្ឋាភិបាល​បាន​ឲ្យ​ដឹង​ថា​ការ​​ដាក់​ពាក្យ​ចុះ​បញ្ជី​ផ្លូវការ​របស់​​​អង្គការ​មិនមែន​រដ្ឋាភិបាល​ (NGO) ដែល​​ប្រតិបត្តិការ​ផ្តល់​កម្ចី​ខ្នាត​តូច​នៅ​តែ​មាន​ល្បឿន​យឺត​នៅ​ឡើយ​ និង​បាន​ជំរុញ​ឲ្យ​គ្រឹះស្ថាន​​ដែល​មិន​បាន​ចុះ​ឈ្មោះ​​អនុវត្ត​តាម​តម្រូវការ​ច្បាប់​ដែល​កំណត់​ដោយ​ធនាគារ​ជាតិ​នៃ​កម្ពុជា​ (NBC)​។

លោក ស ខេង រដ្ឋមន្ដ្រី​​ក្រសួង​មហាផ្ទៃ​បាន​ថ្លែង​បែប​នេះ​នៅ​ក្នុង​សិក្ខាសាលា​ថ្នាក់​ជាតិ​​មួយ​នៅ​ពេល​ថ្មីៗ​​នេះ​ដែល​សំដៅ​ផ្សព្វផ្សាយ​ច្បាប់​ស្ដីពី​សមាគម​ និង​អង្គការ​មិនមែន​រដ្ឋាភិបាល​ (​LANGO​)។ នេះ​បើ​តាម AKP។

យោង​តាម​ទិន្នន័យ​បង្ហាញ​ដោយ​​រដ្ឋមន្ដ្រី​មាន​សមាគម​​ និង​NGO តែ​ ១៥៥ ​ប៉ុណ្ណោះ​ក្នុង​ចំណោម​​​ ៦២០ ដែល​ចុះ​បញ្ជី​នៅ​ក្រសួង​​មហាផ្ទៃ​បាន​​បំពេញ​តាម​តម្រូវការ​ចុះ​បញ្ជី​ដោយ​ធនាគារ​ជាតិ​នៃ​កម្ពុជា​ (NBC) ​ក្នុង​ការ​បន្តការ​ផ្ដល់​​កម្ចី​មីក្រូហិរញ្ញវត្ថុ​។

របាយការណ៍​បាន​​បង្ហាញ​ថា​សម្រាប់​សមាគម​ និង​អង្គការ​ដែល​ទទួល​បាន​​លិខិត​បញ្ជាក់​​មាន​សមាគម​ចំនួន​ ២១ និង NGO ចំនួន​​ ១៣២។

កាលពី​ខែ​កុម្ភៈ​ឆ្នាំ​មុន NBC និង​ក្រសួង​​សេដ្ឋកិច្ច និង​ហិរញ្ញវត្ថុ​បាន​​ចេញ​​ការ​ព្រមាន​មួយ​ប្រឆាំង​នឹង​​ការ​​កើនឡើង​គ្រឹះស្ថាន​ផ្ដល់​​​ប្រាក់​កម្ចី​ដែល​មិនមាន​​អាជ្ញាប័ណ្ណ​ សមាគម​ និង​NGO ដោយ​លើក​ឡើង​ថា​តាមរយៈ​ប្រតិបត្តិការ​នៅ​​ក្រៅ​​ការ​គ្រប់គ្រង​របស់​រដ្ឋាភិបាល ស្ថិរភាព​ហិរញ្ញវត្ថុ​របស់​កម្ពុជា​កំពុង​ស្ថិត​​ក្នុង​ហានិភ័យ​។ ការ​ប្រកាស​​នេះ​បាន​អំពាវនាវ​​ឲ្យ​ប្រតិបត្តិករ​ដែល​មិន​បាន​ចុះ​បញ្ជី​ត្រូវ​មក​ចុះ​បញ្ចី បើ​មិន​ដូច្នេះ​ទេ​នឹង​ត្រូវ​បង្ក្រាប​តាម​ផ្លូវ​ច្បាប់។

លោកស្រី ជា សិរី អគ្គនាយក​របស់​ NBC ​​បាន​ប្រាប់​​ភ្នំពេញ​ប៉ុស្ដិ៍​​កាលពី​ដើម​ខែ​នេះ​ថា​ចាប់​តាំងពី​មាន​សេចក្ដី​ប្រកាស​រួម​មក​គ្រឹះស្ថាន​​គ្មាន​អាជ្ញាប័ណ្ណ​ និង​ក្រៅ​ផ្លូវការ​បាន​​នាំ​គ្នា​ទៅ​ធនាគារ​កណ្ដាល​ដើម្បី​ចុះ​បញ្ជី​ និង​ការ​យល់​ព្រម​ពី​ធនាគារ​ជាតិ​។

លោកស្រី​លើក​ឡើង​ថា​៖ «​គ្រឹះស្ថាន​ផ្ដល់​កម្ចី​​ក្រៅ​ផ្លូវការ​ [​ប្រហែល​] ៣០០ បាន​ដាក់​​ពាក្យ​ទៅ​ NBC ដើម្បី​ចុះ​បញ្ជី​បន្ទាប់ពី​​សេចក្ដី​ប្រកាស​រួម​នេះ​»​​។

លោកស្រី​បន្ថែម​ថា​គ្រឹះស្ថាន​ ៩០ ត្រូវ​បាន​ផ្ដល់​​ការ​យល់​​ព្រម​រួច​​ហើយ​។

លោកស្រី​បញ្ជាក់​ថា​៖ «​បច្ចុប្បន្ន​យើង​កំពុង​ពិនិត្យ​​មើល​ការ​ដាក់​ពាក្យ​សុំ​ទាំង​​នេះ​ហើយ​អាច​សម្រេច​​ក្នុង​​ការ​ចុះ​បញ្ជី​​ពួកគេ ​ឬ​ តម្រូវ​ឲ្យ​ NGO ត្រូវ​បញ្ឈប់​ប្រតិបត្តិការ​​សកម្មភាព​​ឥណទាន​ទាំងអស់​ប្រសិន​បើ​​ពួកគេ​​មិន​ឆ្លើយតប​តាម​លក្ខណៈ​វិនិច្ឆ័យ​ទេ​»​។

យោង​តាម​ប្រកាស​ស្ដីពី​ការ​ចុះ​​បញ្ជី​ និង​​ការ​ផ្ដល់​អាជ្ញាប័ណ្ណ​របស់​​គ្រឹះស្ថាន​​មីក្រូហិរញ្ញវត្ថុ​តាម​​ច្បាប់​កម្ពុជា​ដើម្បី​បាន​​ការ​ទទួល​​​ស្គាល់​ជា​ផ្លូវការ​​ពី NBC ​តម្រូវ​​ឲ្យ​គ្រឹះស្ថាន​ផ្ដល់​​ប្រាក់​កម្ចី​ត្រូវ​មាន​​​ផលបត្រ​កម្ចី​ ២៥ ០០០ ​ដុល្លារ​អាមេរិក ឬ​ច្រើន​ជាង​នេះ​ជាមួយ​នឹង​ប្រាក់​បញ្ញើ​ ២៥០ ​ដុល្លារ​​ ឬ​ត្រូវ​មាន​​​អ្នក​ដាក់​ប្រាក់​បញ្ញើ​ ១០០ ​​នាក់។

លោក ហ៊ួត អៀងតុង ប្រធាន​​សមាគម​គ្រឹះស្ថាន​មីក្រូហិរញ្ញវត្ថុ​កម្ពុជា​​​ថ្លែង​ថា​បទប្បញ្ញត្តិ​​​បច្ចុប្បន្ន​ត្រូវ​បាន​ត្រួតពិនិត្យ​ឡើង​វិញ​ហើយ​រាល់​ប្រតិបត្តិការ​ឥណទាន​ទាំងអស់​គឺ​តម្រូវ​​​​ឲ្យ​ចុះ​បញ្ជី​។​

លោក​ថា​​​៖ «​​គោលនយោបាយ​ចុះ​បញ្ជី​របស់​ MFI របស់ NBC ដើរ​តួនាទី​ដ៏សំខាន់​នៅ​ក្នុង​ប្រតិបត្តិការ​ផ្ដល់​​កម្ចី​»​។

លោក​បន្ថែម​ថា​វា​ផ្ដល់​ការ​​ការពារ​ដល់​គ្រឹះស្ថាន​​ផ្ដល់​​ប្រាក់​កម្ចី​។ លោក​បញ្ជាក់​ថា​៖ «​​សម្រាប់​គ្រឹះស្ថាន​ដែល​ប្រតិបត្តិការ​ដោយ​​មិន​​​ចុះ​បញ្ជី​ប្រឈម​នឹង​ហានិភ័យ​​ខាតបង់​ប្រាក់​ដែល​ពួកគេ​​ផ្ដល់​ទៅ​ឲ្យ​​អតិថិជន​​»​៕

ប្រភព៖ www.postkhmer.com

Submit a Comment

Your email address will not be published. Required fields are marked *

Show Buttons
Hide Buttons