មនុស្សគ្រប់គ្នាតែងប្រាថ្នាភាពជោគជ័យ តែលទ្ធផលវាមិនដូចគ្នានោះទេ។ អ្នកខ្លះក៏ទទួលបានជោគជ័យតាមបំណងប្រាថ្នារបស់ខ្លួនទៅ ខណៈដែលអ្នកខ្លះទៀតបានត្រឹមតែអង្គុយសោកស្តាយស្រណោះមិនសម្រេចអ្វីបានជាដុំកំភួននោះឡើយ។
មកដល់ចំណុចនេះបានធ្វើឲ្យគេនឹកឃើញដល់ទម្លាប់មួយចំនួនរវាងអ្នកជោគជ័យ និង បរាជ័យ។ ជាលទ្ធផលក្នុងចំណោមទម្លាប់ទាំងនេះ គេសង្កេតឃើញថា អ្នកជោគជ័យជាទូទៅបង្ហាញលក្ខណៈសម្បត្តិសំខាន់ៗចំនួន ៨ នេះដែលប្រិយមិត្តអាចយកមករៀនសូត្រធ្វើជាបទពិសោធន៍បាន។
១) អ្នកជោគជ័យ មិនដែលដោះសាចំពោះកំហុសរបស់ខ្លួនទេ។ ប៉ុន្តែបុគ្គលទាំងនេះរៀនសូត្រ និង អភិវឌ្ឍខ្លួនពីកំហុសទាំងនោះ។
២) អ្នកជោគជ័យ មិនដែលត្អូញត្អែរចំពោះអ្វីៗដែលមិនស្របតាមបំណងរបស់ខ្លួនឡើយ។ ប៉ុន្តែបុគ្គលទាំងនេះនឹងព្យាយាមដោះស្រាយឲ្យទាល់តែបាន។
៣) អ្នកជោគជ័យ មិនដែលចម្លងក្បូនពីអ្នកដទៃដើម្បីទទួលបានជ័យជំនះ ឬ ជោគជ័យក្នុងជីវិតនោះ ទេ។ ប៉ុន្តែ បុគ្គលទាំងនេះបង្កើតអ្វីថ្មីដោយខ្លួនឯង។
៤) អ្នកជោគជ័យមិនដែលចុះញ៉ម ឬ សម្ងំដេកដួលនោះទេ នៅពេលបរាជ័យនឹងរឿងអ្វីមួយ។ ប៉ុន្តែបុគ្គលទាំងនេះនឹងក្រោកឈរឡើង ធ្វើកិច្ចការនោះវិញ កាន់តែខ្លាំងឡើង។
៥) អ្នកជោគជ័យ មិនដែលព្រងើយកន្តើយនឹងភាពខ្សោយ និង ទម្លាប់អាក្រក់របស់ខ្លួននោះទេ ។ ប៉ុន្តែបុគ្គលទាំងនេះនឹងកែប្រែចំណុចទាំងនេះ។
៦) អ្នកជោគជ័យមិនដែលបោះបង់ឡើយ នៅពេលដែលជួបស្ថានការណ៍លំបាកៗ។ ប៉ុន្តែពួកគេនឹងព្យាយាមជំនះរហូតជោគជ័យ។
៧) អ្នកជោគជ័យមិនដែលបន្ទោសអ្នកដទៃ ចំពោះកំហុសរបស់ខ្លួននោះទេ ពោលគឺពួកគេតែងទទួលខុសត្រូវរាល់អ្វីដែលខ្លួនបានធ្វើ។
៨) អ្នកជោគជ័យមិននិយាយដើម ឬ និយាយអ្វីមិនល្អពីអ្នកដទៃនោះទេ ។ ប៉ុន្តែ បុគ្គលទាំងនេះ គឺជាមនុស្សដែលមានចិត្តទូលាយ៕
ប្រភព៖ www.thebnews.com
Sitemap
